Welkom op de website van Hou op die Kis!

Mit groot ongeluif en aangesjlage höbbe veer vernóme dat d’n heer

                                                             Ger Schulpen

ós toch nog ónvewachs is ontvalle.

Ger, Sjram,
Veur de meesjte awwere onger ós waor de eesjte kennismaking mit Ger in ’t
Kelderke aan de Riekswaeg, wo hae DJ waar.
Gouwe muziek, sjtomme kal en ein lekker glaas beier, dat waar Ger

Ruum 45 jaor geleje waar hae de mid-oprichter van un kapel.
Ger haej nog urges ein aw FOTO ligge wo get muzikante opsjtonge.
Nemes wos wae dat waore of wo de foto gemaak is,
mer oppe dikke trom sjtong Hou op die Kis
en zo is kapel Hou op die kis gebaore

Jeder jaor vanaaf de 11e van de 11e woort waekeliks bieeingekomme bie
Toos en Ger in de kelder, om ’t idee van de Grote Optoch te bedenke en te make.
Mer aan ideeë ontbrouk ’t Ger neit.
Al gaw wirkde hae ’n idee gans out en sjtong alles tot in detail op papier.
De dames gonge onger leiding van Toos, Christien en Lammy
mit pekskes nejje aan de sjlaag
en de mansluu knutselde aan de grop.

Vastelaovendzondig woort gesjmink bie hun in de kelder
en verangerde de kelder in ein bar, wo nao de optoch nog lang
naogezeivert en geouwehoert woort.
Neit allein veer höbbe dees sjoon herinneringe aan dae tied
mer ouch os kenjer denke nog mit väöl plezeier trök aan vastelaoveszondig
bie Ger en Toos.

Vastelaovesmaondig gonge veer altied mit zien alle nao de Chinees oppe
mert wo Ger zich ummer eine popanponsing besjtelde en dan moosj hae
mer aafwachte wat dae Chinees häöm oppe tejjer lag.
Ger, wat höbbe veer väöl mit dich gelache.
Zo haej hae ’t idee om mer ens es zjwervers verkleid nao Maaseik te gaon.
Geer vuilt häöm al aankomme. Neit allein gekleid es zjwervers, mer veer
ginge os ouch es zjwervers gedrage.
Ger haej zich eine heite honjt besjtelt en dan begoosj de curry urges op dae
heite honjt en leip gans door euver ziene moew pes in ziene nek.
Dan louge veer weier ens kromp van ’t lache.
Zo zeen der zo väöl van die fantastische herinneringe aan Ger.

Honderde repetities höbbe veer same gehad en este dan naeve Ger zouts
koosj get sjaele zeiver neit lang oetblieve.
Hae woor ouch de man dae euveral names de kapel de luuj toesjpraok,
noe mot ich dat doon, dat vilt mich sjwaor.
Helaas höbbe veer al van diverse lede en partners van lede aafsjiet motte numme.
Ger haej de gave hie altied get sjoons euver te sjrieve
en noe höbbe veer get euver dich motte sjrieve.

Ger, veer gaon dich misse, doe mede-oprichter van de kapel.
Aan dich höbbe veer ’t te danke dat dees kapel besjteit wo veer mit zien
alle nog ummer zo väöl plezeier belaeve.
Zo wille en zo gaon veer dich herinnere.
Doe höbs noe dien rus gevonje en bes noe bie Toos.
Adieu Ger, de böl Sjram

Math op de Kamp

Veurzitter kapel “Hou op die Kis”

---

Recente Facebook berichten